OYO ਦੀ ਪੇਰੈਂਟ ਕੰਪਨੀ Prism ਲਿਆਵੇਗੀ 6,650 ਕਰੋੜ ਰੁਪਏ ਦਾ IPO, ਮੌਜੂਦਾ ਨਿਵੇਸ਼ਕ ਨਹੀਂ ਵੇਚਣਗੇ ਇੱਕ ਵੀ ਸ਼ੇਅਰ; ਜਾਣੋ ਪੂਰੀ ਡਿਟੇਲ

ਨਵੀਂ ਦਿੱਲੀ (Prism Financial Turnaround): ਓਯੋ (OYO) ਦੀ ਪੇਰੈਂਟ ਕੰਪਨੀ 'ਪ੍ਰਿਜ਼ਮ' ਨੇ ਭਾਰਤੀ ਸ਼ੇਅਰ ਬਾਜ਼ਾਰ ਦੇ ਰੈਗੂਲੇਟਰ ਸੇਬੀ (SEBI) ਕੋਲ ਆਈਪੀਓ (IPO) ਲਈ ਆਪਣੇ ਅਪਡੇਟ ਕੀਤੇ ਡਰਾਫਟ ਪੇਪਰ (UDRHP) ਜਮ੍ਹਾਂ ਕਰਵਾ ਦਿੱਤੇ ਹਨ। ਕੰਪਨੀ ਇਸ ਪਬਲਿਕ ਇਸ਼ੂ ਰਾਹੀਂ ₹6,650 ਕਰੋੜ ਜੁਟਾਉਣ ਦੀ ਤਿਆਰੀ ਵਿੱਚ ਹੈ। ਜ਼ਿਕਰਯੋਗ ਹੈ ਕਿ ਪ੍ਰਿਜ਼ਮ ਨੇ ਸਤੰਬਰ 2025 ਵਿੱਚ ਹੀ ਆਪਣਾ ਨਾਮ ਬਦਲਿਆ ਸੀ।

ਪ੍ਰਮੋਟਰ ਅਤੇ ਮੌਜੂਦਾ ਨਿਵੇਸ਼ਕ ਨਹੀਂ ਵੇਚਣਗੇ ਆਪਣੀ ਹਿੱਸੇਦਾਰੀ

ਇਸ ਆਈਪੀਓ ਦੀ ਸਭ ਤੋਂ ਵੱਡੀ ਖ਼ਾਸੀਅਤ ਇਹ ਹੈ ਕਿ ਇਹ ਪੂਰੀ ਤਰ੍ਹਾਂ 'ਫ੍ਰੈਸ਼ ਇਸ਼ੂ' (Fresh Issue) ਹੈ, ਯਾਨੀ ਇਸ ਵਿੱਚ ਸਿਰਫ਼ ਨਵੇਂ ਸ਼ੇਅਰ ਜਾਰੀ ਕੀਤੇ ਜਾਣਗੇ। ਇਸ ਵਿੱਚ ਕੋਈ ਵੀ 'ਆਫਰ ਫਾਰ ਸੇਲ' (OFS) ਹਿੱਸਾ ਸ਼ਾਮਲ ਨਹੀਂ ਹੈ। ਇਸ ਦਾ ਸਿੱਧਾ ਮਤਲਬ ਇਹ ਹੈ ਕਿ ਸੌਫਟਬੈਂਕ (SoftBank), ਸੰਸਥਾਪਕ ਰਿਤੇਸ਼ ਅਗਰਵਾਲ, ਮਾਈਕ੍ਰੋਸਾਫਟ, ਏਅਰਬੀਐਨਬੀ, ਲਾਈਟਸਪੀਡ ਅਤੇ ਪੀਕ XV ਵਰਗੇ ਵੱਡੇ ਮੌਜੂਦਾ ਨਿਵੇਸ਼ਕ ਆਪਣੀ ਹਿੱਸੇਦਾਰੀ ਨਹੀਂ ਵੇਚ ਰਹੇ ਹਨ। ਕੰਪਨੀ ਕੋਲ ਮੁੱਖ ਆਈਪੀਓ ਤੋਂ ਪਹਿਲਾਂ ₹1,330 ਕਰੋੜ ਦਾ ਪ੍ਰੀ-ਆਈਪੀਓ ਪਲੇਸਮੈਂਟ ਲਿਆਉਣ ਦਾ ਵਿਕਲਪ ਵੀ ਮੌਜੂਦ ਹੈ।

₹4,987 ਕਰੋੜ ਨਾਲ ਚੁਕਾਇਆ ਜਾਵੇਗਾ ਕਰਜ਼ਾ

ਕੰਪਨੀ ਆਈਪੀਓ ਤੋਂ ਮਿਲਣ ਵਾਲੀ ਰਕਮ ਦਾ ਇੱਕ ਵੱਡਾ ਹਿੱਸਾ (ਲਗਭਗ ₹4,987.5 ਕਰੋੜ) ਆਪਣੇ ਪੁਰਾਣੇ ਕਰਜ਼ੇ ਨੂੰ ਚੁਕਾਉਣ ਜਾਂ ਸਮੇਂ ਤੋਂ ਪਹਿਲਾਂ ਉਸ ਦਾ ਭੁਗਤਾਨ ਕਰਨ ਲਈ ਵਰਤੇਗੀ। ਬਾਕੀ ਬਚੀ ਹੋਈ ਰਾਸ਼ੀ ਦੀ ਵਰਤੋਂ ਆਮ ਕਾਰਪੋਰੇਟ ਉਦੇਸ਼ਾਂ ਲਈ ਕੀਤੀ ਜਾਵੇਗੀ। ਇਸ ਨਾਲ ਕੰਪਨੀ ਦੀ ਬੈਲੇਂਸ ਸ਼ੀਟ ਕਾਫ਼ੀ ਮਜ਼ਬੂਤ ਹੋਵੇਗੀ। ਇਸੇ ਵਿੱਤੀ ਸੁਧਾਰ ਨੂੰ ਦੇਖਦਿਆਂ ਰੇਟਿੰਗ ਏਜੰਸੀ ਐਸਐਂਡਪੀ (S&P) ਗਲੋਬਲ ਨੇ ਕੰਪਨੀ ਦਾ ਆਊਟਲੁੱਕ 'ਸਟੇਬਲ' (ਸਥਿਰ) ਤੋਂ ਵਧਾ ਕੇ 'ਪਾਜ਼ੀਟਿਵ' (ਸਕਾਰਾਤਮਕ) ਕਰ ਦਿੱਤਾ ਹੈ।

ਮੁਨਾਫ਼ੇ ਅਤੇ ਰੈਵੇਨਿਊ ਵਿੱਚ ਭਾਰੀ ਉਛਾਲ

ਪ੍ਰਿਜ਼ਮ ਦੇ ਵਿੱਤੀ ਨਤੀਜਿਆਂ ਵਿੱਚ ਵਿੱਤੀ ਸਾਲ 2026 ਦੇ ਪਹਿਲੇ 9 ਮਹੀਨਿਆਂ (9MFY26) ਵਿੱਚ ਜ਼ਬਰਦਸਤ ਸੁਧਾਰ ਦੇਖਿਆ ਗਿਆ ਹੈ। ਦਸੰਬਰ 2025 ਨੂੰ ਖ਼ਤਮ ਹੋਈ ਮਿਆਦ ਵਿੱਚ ਕੰਪਨੀ ਦਾ ਆਪਰੇਟਿੰਗ ਰੈਵੇਨਿਊ ₹6,941 ਕਰੋੜ ਰਿਹਾ, ਜੋ ਪੂਰੇ ਵਿੱਤੀ ਸਾਲ 2025 ਦੇ ਰੈਵੇਨਿਊ (₹6,259 ਕਰੋੜ) ਨੂੰ ਵੀ ਪਾਰ ਕਰ ਗਿਆ ਹੈ। ਇਸ ਦੌਰਾਨ ਕੰਪਨੀ ਦਾ ਸ਼ੁੱਧ ਮੁਨਾਫ਼ਾ (PAT) ਉਛਲ ਕੇ ₹748 ਕਰੋੜ 'ਤੇ ਪਹੁੰਚ ਗਿਆ, ਜਦੋਂ ਕਿ ਪਿਛਲੇ ਪੂਰੇ ਸਾਲ ਇਹ ਸਿਰਫ਼ ₹245 ਕਰੋੜ ਸੀ।

ਗਲੋਬਲ ਬਿਜ਼ਨਸ ਬਣਿਆ ਗ੍ਰੋਥ ਇੰਜਣ

ਪ੍ਰਿਜ਼ਮ ਮੌਜੂਦਾ ਸਮੇਂ ਵਿੱਚ 35 ਤੋਂ ਵੱਧ ਦੇਸ਼ਾਂ ਵਿੱਚ 43 ਬ੍ਰਾਂਡਾਂ ਦਾ ਸੰਚਾਲਨ ਕਰਦੀ ਹੈ। ਇਸ ਦੇ ਨੈੱਟਵਰਕ ਵਿੱਚ 24,000 ਤੋਂ ਵੱਧ ਹੋਟਲ ਅਤੇ 1.24 ਲੱਖ ਤੋਂ ਵੱਧ ਘਰ ਸ਼ਾਮਲ ਹਨ। ਅਮਰੀਕੀ ਕੰਪਨੀ 'G6 ਹਾਸਪਿਟੈਲਿਟੀ' (ਮੋਟਲ 6 ਬ੍ਰਾਂਡ) ਦੇ ਗ੍ਰਹਿਣ ਤੋਂ ਬਾਅਦ ਅਮਰੀਕਾ ਇਸ ਦਾ ਸਭ ਤੋਂ ਵੱਡਾ ਗ੍ਰੋਥ ਇੰਜਣ ਬਣ ਗਿਆ ਹੈ। ਚਾਲੂ ਵਿੱਤੀ ਸਾਲ ਦੇ ਪਹਿਲੇ 9 ਮਹੀਨਿਆਂ ਵਿੱਚ ਕੰਪਨੀ ਦੀ ਕੁੱਲ ਗ੍ਰਾਸ ਬੁਕਿੰਗ ਵੈਲਯੂ (GBV) ਵਿੱਚ ਇਕੱਲੇ ਅਮਰੀਕਾ ਦਾ ਯੋਗਦਾਨ 52 ਫ਼ੀਸਦੀ ਤੋਂ ਵੱਧ ਰਿਹਾ ਹੈ।

ਦੂਜੇ ਪਾਸੇ ਭਾਰਤ ਵਿੱਚ ਵੀ ਕੰਪਨੀ ਦੇ ਸਰਵਿਸ ਸਟੋਰਫਰੰਟਸ ਦੀ ਸੰਖਿਆ ਵਧ ਕੇ 1,573 ਹੋ ਗਈ ਹੈ। ਇਸ ਤੋਂ ਇਲਾਵਾ, ਦਿੱਲੀ ਆਈਟੀਏਟੀ (ITAT) ਵੱਲੋਂ ਕੰਪਨੀ ਦੇ ਪੱਖ ਵਿੱਚ ₹3,885 |ਕਰੋੜ ਦੀ ਟੈਕਸ ਮੰਗ ਨੂੰ ਰੱਦ ਕਰਨਾ ਵੀ ਇਸ ਆਈਪੀਓ ਲਈ ਇੱਕ ਵੱਡੀ ਰਾਹਤ ਮੰਨਿਆ ਜਾ ਰਿਹਾ ਹੈ।